ምንቁልቋል ንግዲ መካይን ይቕጽል

ብመሰረት ሓበሬታ ማሕበር ቢል ሽወደን (branschorganisationen Bil Sweden)፡ ኣብ ወርሒ ሓምለ፡ 22,718 ሓደስቲ መካይን ምምዝጋበን ሓቢሩ። እዚ ቁጽሪ ምስ ዓሚ ዝነበረ ተመሳሳሊ ወርሒ ክወዳደር እንከሎ ብ4% ዝውሕድ እዩ። ኣብ ወርሒ ሓምለ ዘሎ ምንቁልቋል፡ ካብ ናይ ዝሓለፋ ኣዋርሕ ዝውሕድ እዩ ክብል ቢል ሽወደን ሓቢሩ።

ኣብ ወርሒ ሓምለ ዝተራእየ ምምሕያሽ ምንቁልቋል ዕዳጋታት፡ ብሰንኪ ኣብ ዝበዝሓ ሃገራት ኤውሮፓ ዘሎ መፍረ መካይን ምጅማሩን፡ ካብ ካልኦት ሃገራት፡ ቅድሚ ቅልውላው ኮሮና ዝፈረያ መካይንን ቅያር ኣቑሕትን ከተመጽእ ምኽኣልን  እዩ ክብል ዋና ኣካያዲ ስራሕ ማቲያስ በርግማን ኣብ ዘውጽኦ ጋዜጣዊ መግለጺ ሓቢሩ።

ዛጊት ክሳብ እዚ እዋን፡ 148,403 ሓደስቲ መካይን ምምዝጋበን ክፍለጥ እንከሎ፡ እዚ ምስ ተመሳሳሊ ወርሒ ናይ ዓመተ 2019 ክወዳድር እንከሎ ብ22.5% ምጉዳል ከም ዘርኣየ ይንገር።